20-nji ýanwarda türkmen halkynyň Milli Lideri, Türkmenistanyň Halk
Maslahatynyň Başlygy Gurbanguly Berdimuhamedow Arkadag şäherine iş saparynyň
barşynda Russiýanyň kinologiýa federasiýasyndan Akdost atly türkmen
alabaýynyň halkara üstünlikleri boýunça habaryň gelip gowuşandygyny aýtdy. Bu
babatynda türkmen halkynyň Milli Lideri Halkara Ahalteke atçylyk hem-de Halkara
«Türkmen alabaý itleri» assosiasiýalarynyň wise-prezidentine Russiýada geçirilen
bäsleşiklerde ýeňiji bolandygyny tassyklaýan şahadatnamalary gowşurdy.
2021-nji ýylda Halkara “Türkmen alabaý itleri” assosiasiýasynyň hem-de
Halkara ahalteke atçylyk assosiasiýasynyň Prezidenti Serdar Berdimuhamedow
tarapyndan Tatarystan Respublikasynyň Baştutany Rustam Minnihanowa sowgat
berlen Akdost (Akdus) atly türkmen alabaýy «Merkezi Aziýa owçarkasy» diýen
ýaryşda iki ugur boýunça Russiýanyň çempiony boldy. Ýaryşa tutuş Russiýa
boýunça 200-e golaý it gatnaşdy.
Ol birinji sylaga şu ýylyň 15-nji ýanwarynda arassa ganlylygy we owadanlygy
üçin mynasyp boldy. Bu ugurda gatnaşyjylaryň boýuna, agramyna, beden gurluşyna,
gözelligine we Merkezi Aziýa owçarkalarynyň umumy ykrar edilen talaplaryna
laýyk gelýändigine üns berilýär. Ikinji sylaga bolsa ol 17-nji ýanwarda
düşbüligi, ünslüligi üçin mynasyp boldy.
Akdost Russiýanyň dürli şäherlerinde geçirilen birnäçe sergilere we
bäsleşiklere gatnaşyp, tejribe toplady. Itleriň dürli tohumlarynyň
gatnaşmagynda geçirilen ýaryşda Akdostyň ýeňiş gazanmagy türkmen alabaýlarynyň
hemmetaraplaýynlygynyň subutnamasydyr.
Häzirki wagtda türkmen alabaýy dünýäde iň meşhur tohumlaryň biridir. Alty
müňýyllyk taryhy bolan alabaýlar eýesine wepaly bolmak bilen bir hatarda,
emlägi we goýun sürülerini ygtybarly goramaga hem ukyplydyrlar. Alabaýyň arassa
ganlylygyny saklamak boýunça seleksiýa işleriniň netijesinde türkmen alabaýynyň
ilkinji görnüşindäki keşbi biziň günlerimize hem gelip ýetipdir.
Ýurdumyzda her ýyl Türkmen alabaýynyň baýramy bellenilip geçilýär,
«Ýylyň türkmen edermen alabaýy» atly ýaryş gurnalýar, Halkara «Türkmen alabaý
itleri» assosiasiýasy we türkmen alabaýlarynyň muzeýi hereket edýär.
Alabaýlar türkmen halkynyň durmuşyna mäkäm ornaşdy. Paýtagtymyzda geçirilen
Ýapyk binalarda we söweş sungaty boýunça V Aziýa oýunlarynyň nyşany hökmünde
Wepaly atly alabaýyň şekili seçilip alyndy. Türkmen paýtagtynda alabaý itiniň
heýkeli döredildi.
Russiýanyň kinologiýa federasiýasy (RKF) 1991-nji ýylda döredildi hem-de
kinologiýa guramalarynyň jemgyýetçilik birleşigi bolup durýar.
RKF halkara kinologiýa jemgyýetçiliginde Russiýanyň ýeke-täk resmi wekili
bolup durýar hem-de Russiýanyň iri itşynaslyk birleşigi hasaplanýar. RKF-iň
düzümine Russiýanyň Gulluk itşynaslygy federasiýasy, Russiýanyň Awçylyk
itşynaslygy federasiýasy, Russiýanyň Höwesjeňleriň itşynaslygy federasiýasy,
Garaşsyz itşynaslaryň jemgyýetçilik birleşikleriniň ählirussiýa assosiasiýasy
girýär.
Häzirki döwürde Russiýanyň kinologiýa federasiýasy Russiýanyň iň iri
itşynaslyk guramasy bolup durýar. Russiýanyň kinologiýa federasiýasynyň tohum
kitabynda takmynan 5,5 million it, 1 427 kinologiýa kluby, ýurduň ähli
sebitinden 22 358-e golaý it saklanýan desgalar hasaba alnandyr.