Türkmenistanyň Söwda-senagat edarasynyň başlygy M.Gurdowyň Eýran Yslam Respublikasynyň Türkmenistandaky Adatdan daşary we Doly ygtyýarly ilçisi Ali Mojtäba Ruzbehani bilen bolan duşuşygynda iki ýurduň arasyndaky söwda we ykdysady gatnaşyklary has-da gowulandyrmak we özara hyzmatdaşlygyň ugurlaryny giňeltmek meselesi ara alnyp maslahatlaşyldy.

Söhbetdeşligiň barşynda taraplar ykdysady hyzmatdaşlyk boýunça türkmen-eýran toparlarynyň yzygiderli duşuşyklaryny geçirmek, serhetýaka sebitlerdäki telekeçileriň arasynda çäreleri geçirmek we türkmen-eýran sergilerini we ýarmarkalaryny bilelikde guramak barada pikir alyşdylar.

EYR-niň ilçisi 27-nji aprelden 2-nji maý aralygynda Tähranda geçiriljek «ExpoIran-2024» halkara sergisine gatnaşmagy-da işewür gatnaşyklary ösdürmek we türkmen telekeçileriniň eksport önümlerini öňe sürmek mümkinçilikleriniň arasynda agzady. Bu Eýranyň eksport mümkinçilikleriniň pudagara sergisiniň altynjy neşiridir, ol sebitdäki ýurtlaryň öndürijileri bilen eksportçylaryň arasynda göni aragatnaşyk üçin täsirli iş ýerligidir.

Sergide önümçiligiň dürli pudaklary, hyzmatlary we önümleri görkeziler. Şularyň hatarynda magdan we nebit-himiýa, telekommunikasiýa we mehanika, oba hojalygy we maldarçylyk, bilim we syýahatçylyk, maliýe, hukuk we ulag hyzmatlary, azyk önümleri, awtoulaglar, elektrotehnika we elektronika, elde dokalan we maşyn halylary, hojalyk enjamlary, dokma önümleri, gön we geýim, lukmançylyk we barlaghana enjamlary, sanitariýa we gigiýena esbaplary bolar.

Çeşme: «Türkmenistan: Altyn asyr»