Şu gün Aşgabatda Arkadag Serdarly bagtyýar ýaşlar ýylyna bagyşlanan halkara
ylmy-amaly maslahat we serge öz işine başlaýar. Bu forum mynasybetli
Türkmenistanyň Prezidenti oňa gatnaşyjylara Gutlag ýollady. Gutlagda şeýle
diýilýär:
«Hormatly halkara ylmy-amaly maslahata we sergä gatnaşyjylar!
Berkarar döwletiň täze eýýamynyň Galkynyşy döwrüniň bagtyýar ýaşlary!
Sizi Arkadag Serdarly bagtyýar ýaşlar ýylyna
bagyşlanan halkara ylmy-amaly maslahatyň we serginiň öz işine başlamagy
mynasybetli tüýs ýürekden gutlaýaryn. Ýaşlar hyzmatdaşlygyny halkara derejede
has-da ösdürmekde täze mümkinçilikleri açmaga goşant goşjak bu maslahatyň we
serginiň işine uly üstünlik arzuw edýärin.
Eziz ýaşlar!
Türkmen halkynyň Milli Lideri, Türkmenistanyň Halk
Maslahatynyň Başlygy Gahryman Arkadagymyz tarapyndan esaslandyrylan Berkarar
döwletiň täze eýýamynyň Galkynyşy döwründe biziň her birimizi beýik maksatlara
birleşdirýän şygara öwrülen «Döwlet adam üçindir!», «Watan diňe halky bilen
Watandyr! Döwlet diňe halky bilen döwletdir!» diýen baş ýörelgelerimize
laýyklykda, eziz Watanymyzyň Garaşsyzlygynyň we Bitaraplygynyň binýatlyk
esaslaryny berkidýäris. Milli ykdysadyýetimiziň kuwwatyny has-da artdyrýarys,
mähriban halkymyzyň, aýratyn-da, ýaşlarymyzyň durmuş goraglylygyny, iş
üpjünçiligini, ýaşaýyş-durmuş derejesini gowulandyrýan toplumlaýyn özgertmeleri
üstünlikli durmuşa geçirýäris. «Akylly» şäher konsepsiýasy esasynda gurlan
Arkadag şäheriniň, täze senagat önümçilikleriniň, häzirki zaman bilim we
saglygy goraýyş edaralarynyň, beýleki binalaryň dabaraly açylmagy ýurdumyzyň
kuwwatynyň barha artýandygyny aýdyň görkezýär. Biziň gazanýan ähli
üstünliklerimize şöhratly geçmişimize, häzirki bagtyýar durmuşymyza we nurana
geljegimize buýsanýan, eziz Watanymyzyň güýç-kuwwatyna öwrülen ýaşlarymyzyň
goşandy örän uludyr.
Berkarar döwletiň täze eýýamynyň Galkynyşy döwrüniň bagtyýar ýaşlary!
Ýaş nesiller — jemgyýetiň geljegi. Şonuň üçin hem
ýurdumyzy ösdürmäge gönükdirilen strategiýamyzyň esasy ugurlarynyň biri
hökmünde ýaşlar barada döwlet syýasatymyzy üstünlikli amala aşyrýarys.
Ýaşlarymyzyň ýurdumyzyň jemgyýetçilik-syýasy, durmuş-ykdysady, medeni durmuşyna
işjeň gatnaşmaklary üçin amatly şertleri döredýäris. Her bir güni uly
üstünlikler, milli we halkara ähmiýetli wakalar bilen şöhratlandyrylan 2023-nji
ýylda hem bagtyýar ýaşlarymyz ýurdumyzyň depginli ösüşine, öňe gitmegine
gönükdirilen maksatlarymyzyň üstünlikli amala aşyrylmagyna mynasyp goşantlaryny
goşdular. Arkadag Serdarly bagtyýar ýaşlar ýylynyň jemlerine bagyşlanan bu
halkara ylmy-amaly maslahat we sergi biziň ýaşlarymyzyň gazanýan
üstünlikleriniň hem-de tejribeleriniň ýokary bahalara mynasyp bolýandygyny
aýdyň tassyklaýar.
Arkadag Serdarly bagtyýar ýaşlar ýylynda Türkmenistanyň
Magtymguly adyndaky Ýaşlar guramasy ÝUNESKO-nyň Bütindünýä ýaşlar jemgyýetiniň
resmi agzalygyna kabul edildi. Mary şäherinde Merkezi Aziýa ýurtlarynyň we
Hytaý Halk Respublikasynyň ýaşlarynyň «Beýik Ýüpek ýolunyň täze eýýamy» atly
forumy ýokary derejede geçirildi. Bularyň ählisi ýaşlaryň hyzmatdaşlygyny
halkara derejede has-da işjeňleşdirmekde täze mümkinçilikleriň açylýandygynyň
aýdyň nyşanydyr.
Biziň alyp barýan döretmek we gurmak ýolumyza
eýerip, bilim edaralarynda ylym-hünär öwrenýän, döwlet, häkimiýet, dolandyryş
edaralarynda, senagatda, oba hojalygynda, ykdysadyýetiň dürli pudaklarynda
joşgunly zähmet çekýän, olimpiadalarda, bäsleşiklerde, festiwallarda hakyky
ussatlygyň ajaýyp nusgasyny görkezýän bagtyýar ýaşlarymyz Garaşsyz döwletimiziň
abraýyny has-da ýokarlandyrýarlar. Türkmenistan Watanymyz dürli derejedäki
sport ýaryşlarynyň geçirilýän merkezine öwrüldi. Garaşsyz ýurdumyzyň
türgenleriniň dürli sport ýaryşlarynda yzygiderli gazanýan ajaýyp netijeleri
bizi diýseň buýsandyrýar. Aşgabat şäherindäki Olimpiýa şäherçesinde Kuraş
boýunça dünýä çempionatynyň baýramçylyk ruhubelentliginde, türkmen
myhmansöýerligine laýyk gelýän ruhda üstünlikli geçirilmegi bolsa eziz
Watanymyzyň halkara abraýyny has-da beýgeltdi. Eziz Diýarymyzyň bagtyýar ýaşlarynyň
geljekde-de döwletimiziň mundan beýläk-de gülläp ösmeginiň, halkara
at-abraýynyň has-da belende galmagynyň bähbidine döredijilikli, ak ýürekden
zähmet çekjekdiklerine berk ynanýaryn.
Hormatly halkara ylmy-amaly maslahata we sergä gatnaşyjylar!
Sizi Arkadag Serdarly bagtyýar ýaşlar ýylyna
bagyşlanan halkara ylmy-amaly maslahatyň we serginiň öz işine başlamagy
mynasybetli ýene-de bir gezek tüýs ýürekden gutlaýaryn. Ajaýyp arzuwlar,
ýakymly pursatlar bilen dabaraly garşy alynýan täze — 2024-nji ýylda size öňküden-de
yhlasly we tutanýerli zähmetiňiz, egsilmez zehiniňizdir döredijilikli
başlangyçlaryňyz bilen has belent sepgitlere ýetmegiňizi arzuw edýärin».