2021-nji ýylyň ýazynda Türkmenistan bilen Bütindünýä ösüş banky hususy ulgamy ösdürmegiň maksatnamalaryny ara alyp maslahatlaşdylar. Onlaýn görnüşinde geçirilen duşuşygyň barşynda türkmen tarapyna maliýe ministri Muhammetgeldi Serdarow, Bütindünýä bankynyň wekiliýetine bolsa Ýewropa we Merkezi Aziýa sebitleri boýunça jogapkär wise-prezident Anna Býerde ýolbaşçylyk etdi.
Duşuşykda hyzmatdaşlygyň ileri tutulýan ugurlarynyň biri hökmünde gök-bakja önümlerini ösdürip ýetişdirmek boýunça işler görkezildi. Oba hojalygynyň bu ugrunyň ösüşinde görülýän çäreler onuň eksport mümkinçilikleriniň geljegine täze ugurlary bagyşlaýar. Şeýle hem bakja, gök we miwe önümlerinden durnukly ýokary görkezijili hasylyň alynmagyna ýurdumyzyň oňyn howa şertleri öz täsirini ýetirýär.
Gök-bakja önümleriniň eksportuny ösdürmek boýunça taslama 100 million dollara çenli maýa goýum goýmak meýilleşdirilýär. Häzirki wagtda bu babatda türkmen hünärmenleri bilen Bütindünýä bankynyň wekiliýetiniň arasynda gepleşikler alnyp barylýar.
Şeýle hem duşuşygyň barşynda «Doing business» taslamasynyň çäklerinde söwda gatnaşyklaryny kadalaşdyrmak bilen bagly sowallara garaldy. Türkmen tarapynyň habar bermegine görä, Türkmenistan milli ykdysadyýetine daşary döwletleriň maýa goýum akymy ýokarlandyrmagy maksat edinýär. Bu bolsa maliýe institutlary tarapyndan ýurdumyza maýa goýmagyň geljegine berilýän giň gerimli bahany görkezýär.
Türkmenistan milli bazar ykdysadyýetine we hususy telekeçilik ulgamynyň giňeldilmegine tapgyrlaýyn esasda özgertmeleri girizmegini dowam edip, daşary ýurtly hyzmatdaşlar bilen gatnaşyk edýän hususyýetçileriň paýy artýar. Türkmenistanyň ykdysadyýetiniň ähli ugurlarynda özgertmeler durmuşa geçirildi. Şol özgertmeleriň çäklerinde erkin ykdysady zolaklary döretmek we ykdysadyýetiň täze ugurlaryny ýüze çykarmak boýunça işler alnyp barylýar.
Bu çäreler Türkmenistany Bütindünýä ösüş banky bilen hyzmatdaşlygy ösdürmekde täze geljege ataryp, «Doing business» taslamasynyň ýerine ýetirilmegine oňyn şert döredýär.
Duşuşygyň barşynda Türkmenistan bilen Bütindünýä bankynyň arasynda özara gatnaşyklaryň, şeýle hem Halkara maliýe korporasiýasy (MFK) bilen has-da giň gerimli hyzmatdaşlygyň meýilnamasyny taýýarlamagyň barşy ara alnyp maslahatlaşyldy. 2019-njy ýylyň awgustynda Türkmenistan bilen MFK-niň arasynda hyzmatdaşlyk boýunça Memoranduma gol çekilip, ol şereketleriň we hususyýetçileriň özara gatnaşygyny şertlendirdi. Türkmenistanyň wekiliýeti telekeçileriň isleglerini we olaryň maliýeleşdirilmegiň şertlerini anyklaşdyrmak maksady bilen, MFK bilen türkmen hususyýetçileriniň arasynda onlaýn-duşuşyklarynyň birnäçesini guramaga taýýardyklaryny habar berdi.
Şeýle hem Türkmenistanyň maliýe ministrliginiň ýolbaşçysy kiberhowpsuzlyk üpjünçiligi we töleg ulgamynyň kämilleşdirilmegi boýunça Bütindünýä bankynyň wekiliýetinden maslahatlary almaga gyzyklanma bildirilýändigini beýan etdi.