28-nji awgustda hormatly Prezidentimiz Serdar
Berdimuhamedow Ministrler Kabinetiniň Başlygynyň obasenagat toplumyna
gözegçilik edýän orunbasary T.Atahallyýewiň hem-de welaýatlaryň häkimleriniň
gatnaşmagynda sanly ulgam arkaly iş maslahatyny geçirdi. Onda ýurdumyzyň oba
hojalyk toplumynda hem-de welaýatlarynda ýerine ýetirilýän işleriň barşyna
seredildi. Bu barada Türkmenistanyň Halkara habarlar merkezi habar berýär.
Welaýatlarynyň häkimleri welaýatlarda alnyp barylýan
möwsümleýin oba hojalyk işleriniň ýagdaýy barada hasabat berdiler.
Bellenilişi ýaly, häzirki wagtda pagta ýygymyny
üstünlikli geçirmek üçin welaýatlarda pagta arassalaýjy kärhanalary,
harmanhanalary we pagta ýygyjy kombaýnlary ýygym möwsümine taýýarlamak boýunça
degişli işler alnyp barylýar.
Mundan başga-da, häkimler Bilimler we talyp ýaşlar güni,
şeýle hem ýurdumyzyň Garaşsyzlygynyň 32 ýyllyk baýramy mynasybetli welaýatlarda
açylyp ulanmaga berilmegi meýilleşdirilýän durmuş maksatly binalar barada
hasabat berdiler.
Döwlet Baştutanymyz Serdar Berdimuhamedow hasabaty
diňläp, häzirki wagtda dowam edýän möwsümleýin oba hojalyk işleriniň möhüm
ähmiýetine ünsi çekdi hem-de welaýatlaryň bugdaý ekiljek ýerlerini ekişe
taýýarlamak, şeýle hem ekiş möwsüminde babadaýhanlary ýokary hilli bugdaý
tohumlary bilen üpjün etmek, pagta ýygymy möwsümini guramaçylykly geçirmek
boýunça ýerine ýetirilýän işleri berk gözegçilikde saklamagy häkimlere
tabşyrdy.
Soňra Ministrler Kabinetiniň Başlygynyň obasenagat
toplumyna gözegçilik edýän orunbasary T.Atahallyýew ýurdumyzda alnyp barylýan
oba hojalyk işleriniň barşy barada hasabat berdi.
Bellenilişi ýaly, welaýatlarda gallaçy babadaýhanlarymyz
tarapyndan ýerleri bugdaý ekişi möwsümine taýýarlamak hem-de bugdaý ekişini
agrotehniki möhletlerde we ýokary hilli geçirmek boýunça degişli işler alnyp
barylýar.
Mundan başga-da, wise-premýer Daşoguz we Lebap
welaýatlarynyň şaly ekilen meýdanlarynda, Mary welaýatynyň gant şugundyry
ekilen meýdanlarynda ideg işleriniň dowam edýändigini habar berdi.
Döwlet Baştutanymyz hasabaty diňläp, möwsümleýin oba
hojalyk işleriniň agrotehnikanyň kadalaryna laýyklykda ýerine ýetirilmeginiň
möhüm talap bolup durýandygyna ünsi çekdi hem-de şunuň bilen baglylykda, bugdaý
ekişiniň ýokary hilli we bellenen möhletlerde geçirilmegini, pagta ýygymy möwsümine
ähli düzümleriň doly taýýarlykly gelmegini berk gözegçilikde saklamagy
wise-premýere tabşyrdy.
Soňra döwlet Baştutanymyz iş maslahatyna gatnaşyjylara
ýüzlenip, häzirki wagtda alnyp barylýan möwsümleýin oba hojalyk işleriniň
talabalaýyk ýerine ýetirilmegine jogapkärli çemeleşmegiň zerurdygyny belledi we
bu babatda degişli tabşyryklary berdi.