Şu ýylyň ilkinji alty aýynda Türkmenistan bilen Hytaý Halk Respublikasynyň arasyndaky özara söwda dolanyşygy, 2022-nji ýylyň degişli döwri bilen deňeşdirilende, 12,3 göterim ýokarlandy. Muny Hytaýyň baş gümrük gullugyna salgylanyp, «Biznes Türkmenistan» habar berdi.

Habarda bellenilişi ýaly, 2023-nji ýylyň ýanwar-iýun aýlarynda iki ýurtduň arasyndaky özara söwdanyň umumy mukdary, takmynan, 5,55 milliard dollara barabar boldy.

Söwda dolanyşygynyň esasy bölegi türkmenleriň eksportynyň paýyna düşdi diýlip, habarda aýdylýar. Hasabat döwründe Türkmenistan Hytaýa 5,07 milliard dollarlyk haryt eksport etdi. Olardan 5,05 milliard dollardan gowragy gaz eksportyna degişlidir.

Degişli döwürde Türkmenistanyň Hytaýdan import eden harytlary 476 million dollara barabar boldy.