Şu günler ýurdumyzyň welaýatlarynda, Aşgabat we Arkadag şäherlerinde bilim işgärleriniň awgust usuly-amaly okuwlarynyň geçirilmegine badalga berildi. Guralan okuwlarda baý tejribeli, öz kärine ussat, okuw-terbiýeçilik işlerini ylmy-usuly esasda täzeçil guraýan, döredijilikli işleýän mekdebe çenli çagalar edaralarynyň müdirleriniň we degişli hünärmenleriniň, daşary ýurt dili mugallymlarynyň, şepagat uýalarynyň täsirli çykyşlary, döwrebap ýasalan görkezme esbaplaryň sergileri ýaýbaňlandyryldy.

Bu okuwlarda “Bilim hakynda” Türkmenistanyň Kanunyna, “Berkarar döwletiň täze eýýamynyň Galkynyşy: Türkmenistany 2022–2052-nji ýyllarda durmuş-ykdysady taýdan ösdürmegiň Milli maksatnamasyna” we “Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasyna” laýyklykda, bilim işini döwrebap guramak boýunça alnyp barylmaly netijeli işler barada işjeň pikir alyşmalar guralýar.

Okuwlarda sanly ulgamyň mümkinçiliklerinden işjeň peýdalanmak arkaly ýaş nesle berilýän bilim-terbiýäniň hilini ýokarlandyrmakda, körpeleri bilim dünýäsine aralaşdyrmakda, sowatlylyk we medeniýetlilik boýunça başlangyçlary terbiýelemekde, saglygyny goramakda, arassaçylyk endiklerini kemala getirmekde we mekdebe taýýarlamakda milli ýol-ýörelgelerimiz arkaly arassa ahlaklylyk ruhunda terbiýelemekde öňde durýan möhüm wezipelere aýratyn üns çekilýär.