Türkmenistanda erkin ykdysady zolaklar dörediler: bu barada hepdäniň anna güni geçirilen Ministrler Kabinetiniň onlaýn mejlisinde wise-premýer Hojamyrat Geldimyradowyň hasabatynda bellenilendigi hakynda ýurdumyzyň resmi köpçülikleýin habar beriş serişdeleri maglumat berýär. 

Türkmenistanda erkin ykdysady zolaklary döretmek işleri «Berkarar döwletiň täze eýýamynyň Galkynyşy: Türkmenistany 2022-2025-nji ýyllarda durmuş-ykdysady taýdan ösdürmegiň Milli maksatnamasynyň» we «Türkmenistanyň Prezidentiniň 2022-2028-nji ýyllarda ýurdumyzy durmuş-ykdysady taýdan ösdürmegiň maksatnamasynyň» ileri tutulýan ugurlaryny durmuşa geçirmegiň çäklerinde amala aşyrylar.

Erkin ykdysady zolaklary döretmegiň taslamalary bilen tanşyp, Türkmenistanyň Prezidenti Serdar Berdimuhamedow olary tassyklady we erkin ykdysady zolaklaryň halkara ykdysady aragatnaşyklaryň wajyp bölegidigini hem-de ýurdumyzyň ykdysady ösüşiniň esasy açarydygyny belledi. Döwlet Baştutanymyzyň belleýşi ýaly, bu taslamanyň durmuşa geçirilmegi üçin degişli ugurda daşary ýurtly hyzmatdaşlar bilen özara tejribe alyşmagy işjeňleşdirmek, haryt dolanyşygyny ösdürmek we ykdysady gatnaşyklary ýygjamlaşdyrmak zerurdyr.