2022-nji ýylyň 13-14-nji dekabry aralygynda «Awaza» milli syýahatçylyk zolagynda geçirilen Türkmenistanyň, Azerbaýjanyň we Türkiýäniň döwlet Baştutanlarynyň iki günlük sammiti öz işini tamamlady. Ol giň gerimli döwletara hyzmatdaşlygynyň geljegine we syýasy, ykdysady, ulag hem energetika ulgamlarynda ylalaşyklaryň toplumyna gol çekmäge bagyşlandy. 

Üç döwletiň Baştutanlarynyň duşuşygynyň netijeleri boýunça Prezidentler Türkmenistanyň, Azerbaýjanyň we Türkiýäniň  Baştutanlarynyň Ilkinji Sammitiniň Bilelikdäki beýannamasyny kabul etdiler. Şeýle hem aşakdakylar resminamalara gol çekildi:

- Türkmenistanyň, Azerbaýjanyň Respublikasynyň we Türkiýe Respublikasynyň hökümetleriniň arasynda söwda-ykdysady hyzmatdaşlyk boýunça Ylalaşyga; 

- Türkmenistanyň, Azerbaýjanyň Respublikasynyň we Türkiýe Respublikasynyň hökümetleriniň arasynda   2023-2025-nji ýyllarda ylym, bilim we medeniýet ulgamlarynda hyzmatdaşlyk boýunça çarçuwaly Maksatnama; 

- Türkmenistanyň, Azerbaýjanyň Respublikasynyň we Türkiýe Respublikasynyň hökümetleriniň arasynda gümrük hyzmatdaşlygy boýunça bilelikdäki maslahat toparyny döretmek barada özara düşünişmek hakynda Ähtnama;  

- energetika ulgamynda hyzmatdaşlygy geljekde-de ösdürmek barada  «Türkmengaz» döwlet konserniniň, Azerbaýjan Respublikasynyň energetika ministrliginiň we Türkiýe Respublikasynyň energetika we tebigy ätiýaçlyklar ministrliginiň arasynda özara düşünişmek hakynda Ähtnama; 

- ulag ulgamynda hyzmatdaşlygy geljekde-de ösdürmek barada Türkmenistanyň Ministrler Kabinetiniň ýanyndaky Ulag we aragatnaşyk agentliginiň, Azerbaýjan Respublikasynyň sanly ösüş we ulag ministrliginiň we Türkiýe Respublikasynyň ulag we infrastruktura ministrliginiň arasynda özara düşünişmek hakynda Ähtnama.