Türkmenistanyň Daşary işler ministrliginde 23-nji fewralda Türkmenistanyň we Zimbabwe Respublikasynyň daşary syýasat edaralarynyň arasynda syýasy geňeşmeler geçirildi.
Taraplaryň wekiliýetlerine Türkmenistanyň daşary işler ministriniň orunbasary Serdar Muhammetdurdyýew hem-de Zimbabwe Respublikasynyň Daşary işler we halkara söwda boýunça Hemişelik sekretary Albert Ranganaý Çimbindi ýolbaşçylyk etdiler.
Gepleşikleriň dowamynda taraplar syýasy-diplomatik dialogy işjeňleşdirmäge aýratyn üns berdiler. Mundan başga-da, söwda-ykdysady hyzmatdaşlygy ýola goýmagyň mümkinçilikleri ara alnyp maslahatlaşyldy. Medeni-ynsanperwer ugurda taraplar bilim, sport we syýahatçylyk ulgamlarynda hyzmatdaşlygy giňeltmäge gyzyklanma bildirdiler.
Duşuşygyň netijeleri boýunça taraplar Türkmenistanyň Daşary işler ministrligi bilen Zimbabwe Respublikasynyň Daşary işler we halkara söwda ministrliginiň arasynda syýasy geňeşmeler hakynda Teswirnama gol çekdiler.
Şol gün Türkmenistanyň daşary işler ministri Raşid Meredow bilen Zimbabwe Respublikasynyň Daşary işler we halkara söwda boýunça Hemişelik sekretary Albert Ranganaý Çimbindiniň arasynda duşuşyk geçirildi.
Taraplar Türkmenistanyň we Zimbabwe Respublikasynyň arasynda dostlukly hem-de özara bähbitli gatnaşyklary mundan beýläk-de ösdürmäge ygrarlydyklaryny tassykladylar.