7-nji oktýabrda Türkmenistanyň Prezidenti Serdar Berdimuhamedow Russiýa Federasiýasynyň Prezidenti Wladimir Putiniň çagyrmagy boýunça GDA döwletleriniň Baştutanlarynyň Sankt-Peterburgda geçirilen resmi däl sammitine gatnaşdy.

Duşuşyk Konstantinowsk köşgünde geçirildi. Oňa Russiýa Federasiýasynyň Prezidenti Wladimir Putin, Azerbaýjanyň Prezidenti Ylham Alyýew, Ermenistanyň Premýer-ministri Nikol Paşinýan, Belarus Respublikasynyň Prezidenti Aleksandr Lukaşenko, Gazagystanyň Prezidenti Kasym-Jomart Tokaýew, Täjigistanyň Prezidenti Emomali Rahmon we Özbegistanyň Prezidenti Şawkat Mirziýoýew  gatnaşdy.

Sammiti açmak bilen Russiýa Federasiýasynyň Prezidenti Wladimir Putin GDA döwletleriň Baştutanlaryna çärä gatnaşýandyklary üçin minnetdarlyk bildirdi. Şeýle görnüşli duşuşygyň asylly adata öwrülmek bilen, dostlukly ýagdaýda wajyp meseleler boýunça pikir alyşmaga ýardam berýändigi bellenildi.

Sammitiň barşynda oňa gatnaşyjylar GDA-nyň alyp barýan işleriniň ileri tutulýan ugurlary we özara hyzmatdaşlygy berkitmek bilen bagly geljekki meýilnamalar  barada pikir alyşdylar.  

Sankt-Peterburgda bolmagynyň dowamynda Prezident Serdar Berdimuhamedow Wladimir Putini 70 ýaşynyň dolmagy bilen gutlady. Iki dostlukly döwletiň arasyndaky strategiki hyzmatdaşlygy berkitmekde onuň goşan şahsy goşandy aýratyn bellenildi.

Şol gün türkmen Lideri Pulkowo aeroportyndan Aşgabada ugrady.