Türkmenistanyň Döwlet gümrük gullugy eksport harytlarynyň möçberleriniň artýandygyny habar berýär.

Bu ugurda eksport edilen harytlaryň aglaba bölegini oba hojalyk önümleri düzýär. Şu ýylyň başyndan bäri pomidoryň daşary ýurtlara eksport edilen mukdary 78 müň tonnadan gowrak bolup, bu geçen ýylyň degişli döwri bilen deňeşdirilende 50 göterime golaý ýokary netijä eýedir.

Mundan başga-da, gök-bakja ekinleriniň, miweleriň birnäçe dürli görnüşleriniň (şol sanda guradylan miweleriň), däne ekinleriniň önümleriniň eksportynyň mukdary ýokarlandy.

Şu ýylyň başyndan bäri harytlaryň beýleki görnüşlerinden hususy önüm öndürijiler tarapyndan öndürilýän aýakgaplaryň eksportynyň mukdary hem geçen ýylyň degişli döwründen 3 esse artdy. Eksporty ýokarlanýan harytlaryň hatarynda ýuwujy serişdelerini, mebelleri hem-de gaýtadan işlenen deri önümlerini-de bellemek bolar.

Türkmenistanyň Döwlet gümrük gullugynyň hünärmenleri ýükleriň daşalmagynyň päsgelçiliksiz amala aşyrylmagy üçin ähli zerur çäreleriň geçirilýändigini belleýärler.