Şu gün, 6-njy awgustda Türkmenistanyň çägindäki «Awaza» milli syýahatçylyk zolagynda Merkezi Aziýa döwletleriniň Baştutanlarynyň 3-nji konsultatiw duşuşygy geçiriler. 

Şu mynasybetli Gyrgyzystanyň, Gazagystanyň, Täjigistanyň we Özbegistanyň döwlet Baştutanlarynyň ýolbaşçylygyndaky wekiliýetler «Awaza» milli syýahatçylyk zolagyna geldiler. Mundan başga-da, duşuşyga BMG-niň Merkezi Aziýa üçin öňüni alyş diplomatiýasynyň sebit merkeziniň başlygy gatnaşar. 

Awazada geçirilmegi meýilleşdirilen halkara derejeli çäreleriň hatarynda Merkezi Aziýa döwletleriniň ykdysady forumy, Sebit ýurtlarynyň zenan-ýolbaşçylarynyň birinji dialogy, Milli önümleriň halkara sergisi we milli tagamlaryň festiwaly bar. 

Merkezi Aziýa döwletleriniň Baştutanlarynyň 3-nji konsultatiw duşuşygy we Merkezi Aziýa döwletleriniň ykdysady forumy «Awazadaky» maslahatlar merkezinde, Sebit ýurtlarynyň zenan-ýolbaşçylarynyň birinji dialogy bolsa «Berkarar» myhmanhanasynda guralar.

Türkmenbaşynyň halkara deňiz portunyň çäginde milli önümleriň halkara sergisi geçiriler. Iki günlük serginiň dowamynda sebitiň her bir döwleti öz çäginde öndürilýän önümleri görkezmäge mümkinçilik alar. Sergi 250-den gowrak eksponaty özünde jemlär. 

Ýokary derejeli bu halkara çärelere gatnaşyjylar üçin medeni maksatnama taýýarlanyldy. Oňa laýyklykda «Awaza» boýunça tanyşdyryş gezelenji, dynç alyş zolagynyň döwrebap desgalary bilen tanyşdyryş syýahatlary, Merkezi Aziýa döwletleriniň sungat ussatlarynyň konserti guralar.