2021-nji ýylyň 26-njy iýulynda Türkmenistanyň Maliýe we ykdysadyýet ministri Muhammetgeldi Serdarow bilen Bütindünýä bankynyň Türkmenistan boýunça dolandyryjysy Ýan Peter Olters tarapyndan Türkmenistanyň Hökümeti bilen Bütindünýä bankynyň Halkara täzeleniş we ösüş bankynyň arasynda Karz ylalaşygyna gol çekildi.

Gol çekmek dabarasy  Türkmenistanyň Maliýe we ykdysadyýet ministrliginiň edara binasynda Türkmenistanyň Maliýe we ykdysadyýet ministri M.Serdarow bilen Bütindünýä bankynyň Türkmenistan boýunça dolandyryjysy Ýan Peter Oltersiň we Merkezi Aziýa boýunça sebitleýin direktory Tatýana Proskurýakowanyň arasynda geçirilen  göni wideoaragatnaşyk arkaly iş duşuşygynyň çäginde boldy.  

Duşuşygyň çäginde Türkmenistanyň Prezidentiniň «Covid-19-a garşy hereket etmek» taslamasy boýunça Bütindünýä bankyndan ýurdumyzyň saglygy goraýyş ulgamyna karz almak hakynda» degişli kararyny ýerine ýetirmek  hem-de Bank bilen ýola goýlan hyzmatdaşlygy has-da giňeltmek meseleleri, şol sanda koronawirus  pandemiýasyna garşy göreşmekde özara gatnaşyklary  mundan beýläk-de pugtalandyrmagyň ýollary  ara alyp maslahatlaşyldy.