Halkara hyzmatdaşlygy çygrynda türkmen işewürleriniň üstünlikleri we geljekki ösüş mümkinçilikleri Türkmenistanyň Senagatçylar we telekeçiler birleşmesiniň TMT consultingGroup bilen bilelikde guran halkara forumynyň esasy ugruna öwrüldi. Interaktiw onlaýn-meýdança arkaly türkmen telekeçileri bilen geçirilen söhbetdeşlige Beýik Britaniýanyň, Germaniýanyň, Fransiýanyň, Awstriýanyň, Gyrgyzystanyň, Gazagystanyň, Türkiýäniň, Owganystanyň we beýleki döwletleriň iri kompaniýalarynyň wekilleri çagyryldy.

TS we TB-niň başlygy Döwran Hudaýberdiýew «Halkara hyzmatdaşlygynyň we işewürligiň ösüşinde türkmen telekeçileriniň hem-de senagatçylarynyň orny» atly halkara maslahatyny açyp, türkmen telekeçileriniň mümkinçilikleri hem-de milli ykdysadyýetiň hususy ulgamynyň ösüşiniň görkezijileri hakynda belledi.

Ol öz çykyşynda döwletiň goldaw bermegi esasynda türkmen işewürleriniň ösüşiň täze derejesine ýetendiklerini, Türkmenistanyň Jemi içerki önüminde, ýangyç-energetika toplumyny hasaba almazdan, döwlete degişli däl pudagyň paýynyň 70%-e barabardygyny nygtady. TS we TB-niň başlygy milli ykdysadyýetiň senagat, oba hojalyk, ýangyç we ulag ulgamlarynyň esasy baglanyşygyny özünde jemlemek bilen, türkmen işewürliginiň şu ugurlarda isleg bildirýän taraplar bilen hyzmatdaşlygy berkitmäge taýýardygy hakynda aýtdy.

Häzirki wagtda TS we TB 26 müňden gowrak agzany özünde jemleýär. Ýurdumyzyň hususy kärhanalary uly göwrümli infrastruktura taslamalaryny, şol sanda «Aşgabat ― Türkmenabat» ýokary tizlikli awtobanyň gurluşygyny durmuşa geçirmäge gatnaşýar. Bu taslamanyň bahasy ABŞ-nyň 2,3 milliard dollaryna deňdir.

Türkmenistanyň Senagatçylar we telekeçiler birleşmesiniň agzalarynyň soňky ýyllarda agrosenagat toplumynda gazanan üstünlikleri aýratyn bellenildi. Hususy ulgamyň işewürleri tarapyndan hasylly ýerleriň 100 müň gektary özleşdirildi. Şeýle hem goşmaça 500 gektar ýerler özleşdirildi we döwrebap ýyladyşhanalar guruldy. 2 gektar meýdanda bolsa täze parnikleriň gurluşygy alnyp barylýar. Şu ýylyň başyndan bäri telekeçiler tarapyndan 40 müň tonna pomidor hasyly daşary döwletlere ugradyldy.

Maslahatyň umumy bölegi tamamlanandan soň, forum ikitaraplaýyn görnüşinde dowam etdi. Olar türkmen telekeçileriniň Türkmenistanyň gurluşyk we senagat ulgamyndaky orny, ulag-logistika infrastrukturasynyň ösüşi hem-de agrosenagat toplumy ýaly ugurlary öz içine aldy.

Forumyň esasy işi Türkmenistanyň Söwda-senagat edarasynyň binasynda ýaýbaňlandyryldy.