Geçen hepdede Türkmenistanyň Döwlet haryt-çig mal biržasynyň söwdalarynda geleşikleriň bahasy ABŞ-nyň 30 million 302 müň dollaryndan gowrak boldy.

Daşary ýurt puluna Birleşen Arap Emirlikleriniň, Türkiýäniň, Singapuryň, Owganystanyň, Omanyň telekeçileri  Türkmenbaşydaky nebiti gaýtadan işleýän zawodlar toplumynda öndürilen awtobenzini, uçar kerosinini, nebit koksuny “Türkmengaz” döwlet konserninde öndürilen  suwuklandyrylan gazy, “Türkmenhimiýa” döwlet konserninde öndürilen ownuk däneli hlorly kalini satyn aldylar.  Bulardan başga-da, daşary ýurt puluna Azerbaýjanyň, Gazagystanyň işewürlerine tekiz boýalan we tüýjümek žakkard  önümleri ýerlenildi.

Russiýanyň, BAE-niň, Türkiýäniň işewür toparlarynyň  wekilleri  jemi 95 milliona golaý  manatlyk nah ýüplügi satyn aldylar.

Ýurdumyzyň telekeçileri içerki bazar üçin Türkmenbaşydaky nebiti gaýtadan işleýän zawodlar toplumynda öndürilen gyzdyrylan nebit  koksuny satyn aldylar. Geleşigiň bahasy 1 million 250 müň manada deň boldy.