Hormatly Prezidentimiz Serdar Berdimuhamedow Türkiýe
Respublikasyna amala aşyran resmi saparynyň çäklerinde 26-njy oktýabrda
Ankarada geçirilen Türkmen-türk işewürlik maslahatynyň açylyş dabarasyndaky
eden çykyşynda Bilelikdäki maýa goýum fonduny hem-de Maýa goýumlary boýunça
Bilelikdäki iş toparyny döretmegi teklip etdi.
Döwlet Baştutanymyz Türkmenistan daşary ýurtlar bilen
maýa goýumlary babatda hyzmatdaşlygy ösdürmäge ähmiýet berýändigini we bu ýerde
esasy maksat ýurdumyzda durmuşa geçirilýän iri energetika we infrastruktura
taslamalaryna daşary ýurt maýalaryny çekmekden ybarat bolup durýandygyny
nygtady.
«Şeýlelikde biziň öňümizde işlemek üçin giň meýdança
açylýar. Şunuň bilen baglylykda, Bilelikdäki maýa goýum fonduny hem-de Maýa
goýumlary boýunça Bilelikdäki iş toparyny döretmegi teklip edýäris» diýip,
Arkadagly Serdarymyz belledi.
Döwlet Baştutanymyz şol bir wagtda, türk maýadarlarynyň
we senagatçylarynyň ýurdumyzda alyp barýan işlerini maliýe taýdan
düzgünleşdirmek maksady bilen, Türkiýäniň käbir uly banklarynyň Türkmenistanda
şahamçasyny açmak meselesine seretmegi hem makul görýändigimizi aýtdy.
Çeşme:
«Türkmenistan: Altyn asyr»