27-nji noýabrda Türkmenistanyň Söwda-senagat edarasynyň maslahatlar zalynda Ykdysady Hyzmatdaşlyk Guramasyna agza döwletleriň wekilleriniň arasynda işewürlik maslahaty geçirildi. Onuň netijeleri boýunça ikitaraplaýyn resminamalaryň ençemesine gol çekildi. Işewürlik maslahatyna YHG-nyň Söwda-senagat edarasynyň, BMG-niň Ýewropa ykdysady toparynyň, Aziýanyň ösüş bankynyň, YHG agza döwletleriň Söwda-senagat edarasynyň, Türkiýäniň palatalar birleşiginiň we söwda biržasynyň, Türk-pakistan Söwda-senagat edarasynyň, şeýle hem pudaklaýyň ministrlikleriň, guramalaryň we daşary ýurt kompaniýalarynyň wekilleri gatnaşdylar.  

Türkmenistanyň, Gazagystanyň we Eýranyň demirýol ulaglary ministrlikleriniň arasynda «Gazagystan — Türkmenistan — Eýran» halkara demirýol ýük gatnawyndan peýdalanmak boýunça özara düşünişmek hakynda Ähtnama gol geçildi. 

Ýurdumyzyň «Miweli ülke», «Datly şerbet», «Altyn Ýunus» ýaly hususy kärhanalary öz süýjülik önümlerini Gazagystan, Azerbaýjan, Türkiýe, Täjigistan we Özbegistan döwletlerine eksport etmek boýunça şertnama baglaşdylar. Mundan başga-da, Türkiýäniň mebel önümçiligi boýunça tejribesini Türkmenistanyň önümçilik şertlerinde ýola goýmak barada geleşige gol çekildi. Işewürlik maslahatynda Gazagystandan ýurdumyza däne getirmek hakynda hem ylalaşyk baglanyşyldy. 

Maslahatyň çäklerinde resminamalaryň jemi 17-sine gol çekilip, birža söwdalarynyň netijesi boýunça 25 şertnama baglaşyldy. Söwda şertnamalarynyň umumy bahasy ABŞ-nyň 35,5 million dollaryndan geçdi.

Işewürlik maslahatynyň çäklerinde garyşyk görnüşde ikitaraplaýyn pudaklaýyn duşuşyklaryň birnäçesi guraldy. Olaryň çäklerinde nebitgaz, oba hojalygy, himiýa, azyk, dokma senagaty we söwda ulgamlarynda hyzmatdaşlygyň meseleleri ara alnyp maslahatlaşyldy.