9-njy oktýabrda Birleşen Arap Emirlikleriniň Dubaý şäherine bolan Prezident Gurbanguly Berdimuhamedowyň saparynyň netijeleri boýunça Türkmenistanda birnäçe taslamalary durmuşa geçirmäge maýa goýumy we karz serişdelerini çekmek üçin resminamalaryň toplumyna gol çekildi. Bu barada Döwlet habarlar agentligi habar berýär.

Gol çekilen resminamalaryň arasynda şular bar:

- Türkmenabatdaky garyşyk mineral dökünleriniň önümçiligi boýunça himiýa kärhanasyny enjamlaşdyrmak üçin karz serişdelerini bermek hakynda ylalaşyk;

- «Türkmenenergo» korporasiýasynyň we «Abu Dhabi Future Energy Company PJSC-Masdar» kompaniýasynyň arasynda özara düşünişmek hakynda Memorandum; 

- Türkmenbaşydaky Halkara deňiz portunyň we «DP World FZE» holdinginiň arasynda özara düşünişmek hakynda Memorandum;

- Türkmenistanyň Daşary ykdysady iş bankynyň we Abu-Dabiniň ösüş gaznasynyň arasynda Ýapyk görnüşli «Türkmen maýa goýum» kompaniýasyny döretmek hakynda ylalaşyk;

- Türkmenistanyň Daşary ykdysady iş bankynyň we Dubaý şäheriniň ykdysady ösüşi dolandyrmak departamentiniň arasynda özara düşünişmek boýunça Memorandum.

Ozal hem, şu ýylyň iýun aýynda Abu-Dabiniň Ösüş gaznasy Türkmenistana Balkan welaýatynyň Jebel şäherinde aeroport gurmagyň we Serdar etrabynda kuwwatlylygy 10 megamatt bolan garyşyk gün we ýel elektrostansiýasynyň taslamalaryny ýerine ýetirmek üçin ABŞ-nyň 100 million dollary möçberinde karz serişdelerini berdi.